Denborak hegan
egiten du aurrera eta gizartean aldaketak gertatzen diren bitartean, horrek
barnean biltzen dituen esparruetan ere aldaketak gertatzen dira konturatu ere
egin barik. Hezkuntza kasu, gaur egun, mugikorrak horrekin lotu eta probetxuzko
zerbait ateratzea izugarri zail ikusten da. Hau da, gizarteak ia ezinezkotzat
du hezkuntzan mugikorrek erabilera didaktiko bat izatea. Izan ere, IKT honen
erabilera desegokia izan da ikasleen partetik, irakasleengan horien erabilerarekiko
desadostasun edo beldur bat. Erabilera desegokia esatean helburu didaktikoekin
lotuta ez dagoen erabilerarekin lotzen da, irakasleei argazkiak ateratzearekin
gero sare-sozialetan eskegitzeko, liskarren grabaketak egiteko, besteak beste. Beraz,
horrek hain garrantzitsua eta positiboa izan daitekeen gailua hezkuntzatik
kanpo uztea ekarri du, bere ondorio guztiekin, hots, ezin izango dira
mugikorrak irakaste-ikaste prozesua hobetzeko erabili.
Guretzako ere zaila
da mugikorrak hezkuntzan izaera didaktiko batekin ikustea, nahiz eta egunerokoan
horiek erabiltzen ditugun hainbat gauzetarako. Izan ere, hasieran esan bezala, gizartean
dauden aldaketa bortitzek hezkuntzan ere aldaketa bortitzak egotea, edo
behintzat hori nahi izatea, eragin du. Beste gauza bat da horiek onartuak
izatea, edota eskoletan aldaketak horiek aplikatzea. Hala ere, eskolek
gizartearen isla izan behar dute, eta gizartean zerbait gertatzen baldin bada,
eskolara eraman beharreko kontua da, ezta? Guretzat, bederen, eskolek eta
horien funtzionamenduek gizartearen araberakoak izan behar dute, hots, ezin
dira iraganeko metodoetan gertatu gizartean aurrerakuntza nabariak izan
direnean.
Hemendik abiatuta,
gure erronka hainbat galderen erantzuna bilatzea izango da: noiz hasi behar
dute umeek gero eta lehenago izaten dituzten mugikorrak erabiltzen?; zertarako
eta nola erabiliko dituzte eskolan?; eskolatik kanpo ikasteko erabil dezakete?
Nola?; horiek erabiliz eskolan ariketak
egin daitezke?. Galdera mordoa dira, nahiz eta aurreko nagusi horiek erantzunda
uste dugun gainontzeko “azpi-galderak” erantzunda geratuko direla. Horrez gain,
esan behar dugu, horiek erantzuteko azken egun hauetan jasotako informazioan
oinarritzeaz gain, esperientzietan eta ikusitako zenbait egoeretan oinarritu
garela.
Hasteko, esan behar
dugu mugikorrak gure gizartean gero eta gehiago erabiltzen diren teknologiak
direla. Gizartearekin jarri diogun harreman horrek hamaika faktore bil ditzake.
Esaterako, nork ez du inoiz ikusi ongi jantzia dagoen pertsonaren bat lanera
bidean edo lanetik bueltan laneko kontuak argitzen? Lan ugaritan ezinbesteko
tramankulu bilakatu den gailua da sakelakoa. Beste egoera argi bat zera da,
umeek gero eta gazteago jasotzen dutela euren lehenengo mugikorra. Beraz,
ondorioztatu dezakegu gizarteak IKT honen erabilera eskatzen duela nolabait,
eta hortaz, gizarteak berak (familiak…)
umeak bertan bizitzeko prestatzen dituela, eguneroko bizitzan erabiltzen diren
gailu horiek eskainiz eta emanez.
Harrigarria bada
ere, ondorengo irudian taldekide baten lagun baten semea ikus dezakezue, oraindik
oinez ere ez dakiena eta urte bete hiru aste barru beteko dituena. Eta zer
dauka eskuan? Jostailuzkoa bai, baina, mugikorra dauka. Egia da deirik egingo
ez duela, mezurik bidaliko ez duela, baina oinez jakin ez eta eskuetan
horrelako tresnak nola erabili irakasten ari zaio inkontzienteki. Gainera,
irudiak dituzten botoietan ematean irudi bakoitzari dagokion soinua egiten du
jostailuak, eta horrela, irudiak soinuekin eta errealitatearekin lotzen hasten
da umea.
Agian, goizegi dela
pentsa dezakezue, baina, gizarteak IKTak ongi erabiltzen jakitea eskatzen badu
(bai lanera eta bai beste gauzetarako), zergatik ez hasi jostailuen bidez IKTak
direlakoan horien inguruko zerbait irakasten? Gure ustez, berdin da noiz hasi
etorkizunean aurkituko dutena irakasten, kontua unea heltzean horiek prest
egotea baita. Hala ere, ezin dugu ahaztu hori familien kontua dela, eurek
aukeratzen baitute nola, noiz, zertarako eta zerekin hezi euren seme-alabak.
Bestetik,
eskolarekin lotutako ariketak ARIKETAK IKT-EKIN orrialdean azalduko ditugu
zehatzago eta argiago. Hala ere, esan behar dugu ongi pentsatuta, badaudela
ariketa ugari mugikorren egin daitezkeenak. Esate baterako, orain arte idatziz egin ditugun ariketa asko
gailu horien bidez egin daitezke. Gainera, horiek erabiltzeak ikasleengan
motibazioa suspertu dezakeelakoan gaude, ikasteko gogoak handiagoak izanik; eta
gure ustez, horrek, gehienetan, emaitza hobeak lortzea eragiten du, izan ere,
motibazioa eta zerbaitetarako gogoa izatea da helburu jakin hori lortzeko
oinarria. Bestalde esan behar dugu, mailaz aurrera egin ahala, ariketak
zailagoak bilakatuko direla, atzerriko hizkuntza ikastean, hiztegitik
gramatikara igaroz, esate baterako.
Ildo beretik
jarraituz, irakaste-ikaste prozesuko metodologia ere alda genezake. Adibidez,
apunteak hartzeko zergatik ez mugikorra erabili grabaketen bitartez? Zergatik
ez grabatu gure burua klase aurrean azalpen bat eman behar dugunean, eta gero
grabaketa hori jarri ia klase guztietan dauden proiektore horietan? Zergatik ez
grabatu talde lan baten nondik norakoak, horrela arazo eta aurrerapenen berri izanda,
aurreragoko lana eta talde dinamika errazago aurrera ateratzeko? Zergatik ez
mugikorra erabili, besterik gabe, gauza gordetzeko? Zergatik ez mugikorra
erabili klaseko egoera adierazgarriren bat argazki bidez gordeta izan eta klase
hori errazago gogoratzeko? Ziurrenik, denbora luzez pentsatzen jarriko bagina
erabilera didaktiko gehiago aterako genizkioke tramankulu honi.
Hala eta guztiz
ere, aipatu nahiko genuke erabilera horien kontrola ezinbestekoa dela, ikasle
askok ez baitute barneratuta helburu didaktikoak lortzeko baliabideak direla
sakelakoak, eta baita gainontzeko IKTak ere. Uste dute entretenimendurako
soilik direla , beraz, agian gazteak kontzientziatzeko lana egin beharko
litzateke, hitzaldi eta abarren bidez.
Amaitzeko, gustatuko
litzaiguke esatea, eskolaz kanpo ere sakelakoekin ikasi egin daitekeela. Pasadan
egunean gutako bat zazpi urte inguruko ume bat ikusi zuen metroan, emakume
batekin (zaintzailearekin akaso), eta metroan sartu eta berehala mugikorra
atera zuten. Umeak bidai osoan zehar tresna eskuetan izan zuen eta ingelera
ikasten zihoan, ingelerako hiztegia, alegia. Lau irudi agertzen zitzaizkion
pantailan eta behealdean, irudi guztien azpian, hitz bakar bat. Mutilak hitzak
zer esan nahi zuen asmatu behar zuen, erantzun zekienean irudi horren gainean
atzamarrarekin joz (ukimen-pantailek hori da daukatena, gainean jo eta kasu
egiten digute). Erantzuna zuzena bazen hurrengo hitz batera igarotzen zen,
jokoak aurrera eginez; ez asmatzean, ordea, berriro agertzen zitzaion galdera
bera umeak erantzun egokia eman arte. Eta eskolaz kanpoko ariketa honetan, umeak
ikasi egiten du, ezin dugu hori zalantzan jarri. Hala ere, ariketa horiek
egitera bultzatzen duen zera da, mugikor batekin ari dela jolasean, berriro
diot, JOLASEAN, berak jolasten ari dela pentsatzen baitu.
Laburbilduz, gizartean gero eta gehiago erabiltzen dira
IKTak eta ,beraz, MUGIKORRAK. Hortaz, inkontzienteki edo kontzienteki familiek
euren seme-alabek etorkizunean mugikorrak erabiltzen jakiteko erraztasunak
eskaintzen dituzte, sakelako horiek gero eta arinago erosiz. Gainera, betidanik
ezagutu ditugun erabilera desegokiak murriztu eta erabilera didaktikoak
bermatzeko baliatu behar digutu, bai pertsona moduan eta baita maisu-maistra
moduan ere, umeen motibazio eta ikasteko gogoek gora egiten baitute horiek
erabilita, horrela, emaitzak ere hobeak izan daitezkeelarik. Hala ere, ezin
dugu ahaztu, gizartearen eta hezkuntzaren aldaketa bortitzak direla eta, jendea
kontzientzako hitzaldiak ere askotan ezinbestekoak direla, horretara maiz
jotzen ez dugun arren.
No hay comentarios:
Publicar un comentario